أول تعليق من أحمد عصام السيد على أزمة مسلسل فخر الدلتا

علق الفنان أحمد عصام السيد، أحد أبطال مسلسل فخر الدلتا، عبر حسابه الرسمي على موقع التواصل الاجتماعي «فيسبوك»، على أزمة المسلسل بعد حذف اسم المؤلف.

وكتب أحمد عصام السيد: «هأتكلم حاليا كأحمد عصام الفرد، نفسي الناس تكون مكتوب على جبينهم حقيقتهم عشان نتجنب مواقف كتير، لكن الحياة مش كده.

الساعات اللي فاتت فضلت ساكت وبسمع من صديقاتي إيه اللي المفروض أعمله عشان أعمل حاجة مفيدة، فمبدئيا بسجل دعمي لأي بنت متضررة.

دايما مش سهل البوح وكشف الحاجات اللي زي دي لأسباب كتير، لكن دايما بيكون ده الصح».

وأضاف: «ثانيا، مع اللي حصل واللي بيحصل، بحب أأكد إننا كرجالة محتاجين نكون منتبهين دايما، خصوصا مع زيادة حوادث التحرش ضد النساء والبنات دلوقتي أكتر من أي وقت فات.

لو حد جالنا بشكوى، لازم نكون متفهمين وسريعي التحرك، مش دفاعيين لكن بنسمع وبنقدر.

مش المفروض تحت أي ظرف نقلل أو نخفف من الوقائع دي».

وتابع السيد: «ثالثا، لازم التغيير ييجي من النفس، دايما خليك واعي براحة أو عدم راحة الطرف اللي قدامك، واسأل واستأذن واستفسر.

بقول الكلام ده لنفسي قبل أي حد.

كل الدعم لكل امرأة شجاعة قررت تتكلم، وكل الدعم لكل امرأة لسة مش قادرة تتكلم».