تنتظر الأسر والعائلات شهر رمضان من العام للعام، فمع أذان المغرب تتجمع حول المائدة لتناول وجبة الإفطار في أجواء مليئة بالسعادة والبهجة، إلا أن هذه الأجواء ليست من بين الطقوس المعتادة لدى وفاء سعيد، لأن طبيعة عملها تجبرها على الإفطار بمفردها داخل المحل الذى تملكه بالجيزة.
قبل أذان المغرب بساعتين تتوجه «وفاء»، إلى محلها الذي لا تتجاوز مساحته عدة أمتار في أحد الشوارع بفيصل، وتمارس عملها، ومع سماع صوت الأذان تضطر للإفطار بمفردها: «أعمل في مجال الخياطة ولدىّ محل أمارس فيه عملي قبل وبعد المغرب وأضطر لتناول الإفطار لوحدي وترك أولادي في البيت»، بحسب ما روته لـ«الوطن».
اعتادت «وفاء» على الإفطار بمفردها داخل محلها منذ 15 عاماً، مشيرة إلى أنها تفتقد الأجواء العائلية واللمة الرمضانية، لكن طبيعة العمل تجبرها على ذلك: «شهر رمضان ده شهر الكل بيستناه وأنا نفسي بستناه لأنه كله روحانيات حتى يعني القعدة والفطار في المحل لوحدي بيكون فيه نوع من الفرحة إنك يا دوب تاكل بسرعة عشان تكمل شغلك»، مشيرة إلى أنها تشعر أيضاً بالسعادة في هذا الشهر المبارك: «في رمضان بشوف ناس طالعة وناس داخلة، طبيعة الشغل بتحكمك أنك تقابل وجوه كتير وتقابل أشخاص كتير وفي حاجات حلوة كتير أوي في رمضان طبعاً بيختلف عن الأيام العادية، رمضان دايماً تلاقي الناس معاك وجنبك».
تأخذ «وفاء» إفطارها معها بعد تجهيزه في المنزل، وتتجه إلى محلها لممارسة عملها: «أوقات قبل ما أنزل باخد فطاري معايا ولو لقيت نفسى اتأخرت على الشغل بناتي بيجهزوا الأكل وبيجيبوه ليا بعد الفطار، يعني بكسر صيامي بأي حاجة وبعدين باكل على حسب اليوم وطبيعة الشغل»، مشيرة إلى أنه رغم هذه المعاناة إلا أنها تشعر بالسعادة عندما تنجز عملها المطلوب: «لما بخلّص الشغل المطلوب مني من الزباين بفرح بنتيجته لما تشوف الفرحة على وجوههم، وبحس أن جهدي ماراحش على الفاضي.
بحس أن قعدتي في المحل وتضحيتي باللمة مع أهلي وأصحابي من أجل الشغل لها نتيجة كويسة فببقى فخورة بنفسي وبشغلي».
وحول شعورها بعد الإفطار بمفردها، قالت: «الشعور مختلط هو شعور جميل وصعب في الوقت نفسه، أحتاج إلى لمة أبنائي حولي وأحتاج في نفس الوقت إلى إنجاز عملي علشان أشوف فرحة الزبائن.
إنك تفطر لوحدك في مكان شغلك وتسيب كل حاجة وراك ده تقديس للعمل وربنا يوفقنا جميعاً ويرزقنا.
ودي طبيعة الحياة أوقات بتجبرنا على حاجات بنعملها خارج إرادتنا علشان الحياة تستمر».
تعمل «وفاء» في مجال الخياطة منذ أكثر من 16 عاماً، لذلك يعد شهر رمضان موسماً بالنسبة لها تنتظره من عام لآخر: «أنا شغّالة خيّاطة حتى المفروشات والستائر، لأن طبيعة الشغل في رمضان بيبقى فيه ضغط فصعب إن الواحد يفطر في بيته وأضطر أفطر في المحل»، مشيرة إلى أنها تبدأ عملها قبل أذان المغرب بساعتين حتى ميعاد السحور: «بقعد في المحل بتاعي قبل المغرب بساعتين لغاية وقت السحور وأوقات لغاية الفجر وكمان بتسحر في المحل بس عيالي وزوجي بيتسحروا معايا بنعوض وقت الفطار وهكذا لغاية آخر الشهر».
يعد شهر رمضان ذروة الموسم بالنسبة لـ«وفاء»، فهي تنتظره من عام لآخر: «رمضان بالنسبة ليا موسم ومش بنريح فيه خالص علشان الشغل بيكون كتير، بنعمل مفروشات رمضان وكمان الزينة والخيامية والزباين بتطلب شغل كتير»، مشيرة إلى أنها مع قدوم نصف الشهر تكثف ساعات العمل: «في نص رمضان بقى بشتغل ساعات زيادة يعني ممكن أقفل بعد الفجر علشان بتكون فيه طلبات العيد زي المفروشات والستاير وغيرها».
ورثت «وفاء» مهنة الخياطة من والدتها عندما كانت تبلغ من العمر 18 عاماً: «اتعلمت الخياطة من أمي، هي كانت ممرضة وكمان خياطة فى نفس الوقت، لغاية لما بقيت أعمل كل حاجة بنفسي».
كورسات على «يوتيوب» لتطوير التصاميم.
تتعلم «وفاء» الكثير في مهنتها، وتحرص على المشاركة في كورسات الخياطة على منصة «يوتيوب»: «لازم كل فترة أجدد من شغلي وأشوف إيه الجديد، ولو فيه تصميم مش عارفاه باشغل كورسات على اليوتيوب علشان أتعلم منها لغاية لما أعمل الحاجة».
تروج السيدة الثلاثينية لتصاميم عبر حسابها الشخصي على مواقع التواصل، إذ تمكنت من اكتساب العديد من الزبائن من مختلف المحافظات: «شغلي كله بانشره على صفحتي وجروبات الماميز علشان الناس تشوف، وفعلاً بقى ليا زباين وكمان بقيت بسفّر الحاجة بره مصر والحمد لله، ولما حد يقول ليا إن التصميم عجبه ده بيشجعني جداً إني أكمل».
أنواع مختلفة من التصاميم تقدمها «وفاء» في شهر رمضان منها الستائر المصنوعة بقماش الخيامية ومفروشات المنزل المصنوعة أيضاً بقماش الخيامية: «أنا بقيت أعمل كل حاجة خاصة برمضان؛ يعني بعمل مفروشات سراير ومفروشات سفرة، بشتري القماش وأنا اللي بصمم كل حاجة».
تأمل ابنة محافظة القاهرة أن توسع مشروعها ويصبح لديها متجر ملابس في يوم من الأيام: «نفسي أوسع المشروع بتاعي وأشغل ناس كتير معايا وأعمل براند خاص بيا وربنا يراضيني وتعبي ما يروحش هدر».
التعليقات (0)
لا توجد تعليقات حتى الآن. كن أول من يعلق!
أضف تعليقك