أشاد الإعلامي خالد الغندور بتاريخ نادي الزمالك وتصدره لجدول ترتيب الدوري المصري الممتاز في ظل الظروف الصعبه التي يمر بها.
و كتب الغندور، عبر حسابه الشخصي على موقع التواصل الاجتماعي فيسبوك: حد فاكر تشكيل الزمالك في نهائي القرن تخيل التشكيل كان قوي لدرجة ايه، لدرجة إن إمام عاشور نجم النجوم دلوقت ما كانش أساسي، لا دا ما كانش في القايمة أساسا بتاعة الماتش.
و أضاف: تخيل أكتر معايا الزمالك خلال كام شهر بعد النهائي ما بقاش عنده.
أبو جبل، محمود علاء، عبد الشافي، طارق حامد، إمام عاشور، فرجاني ساسي، زيزو، أشرف بن شرقي، مصطفى فتحي، مصطفى محمد، شيكابالا.
من يومها والأزمات نازلة زي المطرة على الزمالك يجيب مدرب أجنبي كويس يتخطف على الخليج، يظهر عنده نجم والجمهور يرتبط بيه.
إيقافات قيد مالهاش عدد ولا حصر.
و تابع: حتى المجلس الجديد لما حاول يشم نفسه ويعمل مشروع جديد أرض أكتوبر اتسحبت وخساير النادي بالمليارات كان طبيعي جدا جدا إن الزمالك يقع.
بس من امتى والزمالك بيعمل الطبيعي؟ !! !
الزمالك زي البحر وزي الفن وزي الموسيقى وزي بكره الزمالك حلم وتاريخ من الإخلاص النادر بينه وبين جمهوره.
عادي جدا.
قلب الجمهور هيعوض أي نقص، لأن مفيش أزمة مهما كانت جبارة تقدر تشيل عشق الخطين الحمر والتيشيرت الأبيض من القلوب.
و أشار: محدش هيقدر يمنع السحر.
الإكسير اللي حمادة امام سلمه لحسن شحاتة، وحسن سلمه لجمال عبد الحميد وجمال سلمه لأيمن منصور وأيمن بيسلمه لعبد الحليم علي والعندليب بيسلمه لشيكابالا وشيكا بيسلمه لجيل أحمد فتوح وبيزيرا ومحمد السيد ومحمد شحاتة الجمهور مؤمن باسم الزمالك وقيمته وتاريخه الجمهور عارف ان حب الزمالك زي حب الشعرا لكل مستحيل النهاردة أشبال وشباب عارفين قيمة تيشيرت العمر يا أبيض.
التعليقات (0)
لا توجد تعليقات حتى الآن. كن أول من يعلق!
أضف تعليقك