أكد الفنان إسلام جمال، أن العمل مع الفنان محمد فراج، كان متعة بالنسبة له، كما أشار إلى أن الهدف من مسلسل «أب ولكن»، كان تسليط الضوء على أن هناك رجالا تم ظلمهم وليست النساء فقط.
وجاءت تصريحات الفنان إسلام جمال لبرنامج لمن يهمه الفن، تقديم أميرة نور على نغم إف إم، على النحو التالي:- حب الناس للفنان، رزق وكرم كبير من ربنا.
- بحاول الاختلاف والتنوع في اختيار أدواري، وساعات ربنا يبعت لي حاجة وعكسها، زي دور كوميدي، ودور" فيلين" فيه الشر، ومفيش أحسن من اختيارات ربنا.
- مسلسل" أب ولكن" كان هدفه تسليط الضوء على فكرة إن زي ما فيه ستات كتير مظلومة، فيه رجالة كمان مظلومة، وده كان الهدف الأول للمؤلفة والمخرجة أستاذة ياسمين أحمد كامل.
- عجبني جدا التحول الكبير في شخصيتي من أول ما قريت العمل، والمفاجأة اللي حصلت للجمهور، وده حصل مع معظم شخصيات العمل.
- أكتر طرف ضعيف وبيدفع فواتير مش بتاعته في الخلافات الأسرية هم الأطفال.
- الشغل مع النجم محمد فراج في" أب ولكن"، كان متعة كبيرة، نظرا لحضوره وكاريزمته، وكمان انضباطه.
- عندي معارف كتير، لكن الأصدقاء الحقيقيين مش كتير، وأصدقائي في الوسط الفني نجوم كبار بمنزلة الأخ الأكبر، زي النجم أمير كرارة، اللي مش هنسى دعاءه لي أمام الكعبة، وقلبه فعلا طيب وجميل ويستاهل كل خير.
- وأنا صغير كنت بحط كل طاقتي وشقاوتي في لعب الكورة، وحب التمثيل نشأ جوايا من حب المسرح، لما كنت في تانية إعدادي، ومثلت في مسرح المدرسة.
- عندي ابني عزالدين، ودلعه زوزي، وزوجتي مودة هي اللي شايلاني أنا وابننا، وحقيقي مفيش كلام ممكن يوصفها.
- تعرفت على زوجتي من خلال أزواج مشتركين بينا في الجيم، وزواجي منها كان رزقا كبيرا من ربنا، وأول معرفتها بيا كانت بتنتقد أعمالي بكل صراحة.
التعليقات (0)
لا توجد تعليقات حتى الآن. كن أول من يعلق!
أضف تعليقك