نشر تليفزيون اليوم السابع حلقة جديدة من برنامج" كده رضا"، والتي يعدها ويقدمها الكاتب الصحفي محمود رضا الزاملي، واستعرضت الحلقة تفاصيل زيارة القلعة بالكامل، مع شرح عملي لكل الأماكن وطريقة الوصول بالمترو، وتعد قلعة صلاح الدين الأيوبي واحدة من أهم المزارات التاريخية في مصر، بتذكرة واحدة للمصريين بـ60 جنيه والطلاب بـ30 جنيه، تقدر تعيش جولة متكاملة على 10 مزارات.
واستعرضت الحلقة أن القلعة مش مجرد مكان أثري، لكنها كانت مقر حكم مصر لأكتر من 600 سنة، وشهدت أحداث ضخمة غيرت شكل الدولة، من أول ما تدخل، هتحس إنك رجعت بالزمن، وكل ركن فيها بيحكي حكاية من عصور مختلفة، من الأيوبيين لحد العثمانيين.
ومن أبرز الأماكن اللي هتزورها، مسجد السلطان محمد بن قلاوون، واللي بقاله أكتر من 700 سنة، وبيتميز بتصميمه الفريد وقبته الخضراء ومآذنه المميزة، وبيعتبر من أجمل المساجد التاريخية داخل القلعة، بالإضافة إلى أيقونة القاهرة وهى جامع محمد على بمآذنه وتصميمه الذى يشبه القصر وليس مسجد للصلاة.
كمان هتلاقي متحف الشرطة القومي، واللي بيعرض قصص حقيقية من تاريخ الأمن في مصر، بجانب سجن القلعة، اللي بيكشف تفاصيل حياة المساجين زمان، واللي اتحبس فيه شخصيات مهمة منهم محمد أنور السادات قبل ما يبقى رئيس.
ولو بتحب الصور، فمنطقة البانوراما داخل القلعة هتديك واحد من أجمل المشاهد للقاهرة، وممكن تشوف منها معالم بعيدة زي أهرامات الجيزة في يوم صافي، وده بيخليها مكان مثالي للسيلفي والتصوير.
ومن الأماكن اللي ليها طابع تاريخي قوي، ممر مذبحة المماليك، اللي شهد نهاية حكم المماليك وبداية عصر جديد بقيادة محمد علي، وكمان مدفع رمضان، أقدم مدفع إفطار في العالم واللي بدأت منه الفكرة وانتشرت.
الزيارة كمان بتشمل المتحف الحربي المصري، ومسجد سليمان باشا الخادم أول مسجد بالطراز العثماني في مصر، وأخيرًا ساحة محكى القلعة اللي بتستضيف فعاليات ومهرجانات زي مهرجان القلعة الدولي للموسيقى والغناء، لتكون الزيارة تجربة كاملة بين التاريخ والفن.
التعليقات (0)
لا توجد تعليقات حتى الآن. كن أول من يعلق!
أضف تعليقك