مهند لاشين يروي كواليس غرفة ملابس منتخب مصر أمام نيوزيلندا

كشف مهند لاشين، لاعب منتخب مصر، كواليس ما دار داخل غرفة الملابس بين شوطي مباراة نيوزيلندا في كأس العالم 2026، مؤكدًا أن المدير الفني حسام حسن كان غاضبًا بعد انتهاء الشوط الأول بتأخر المنتخب بهدف دون رد، قبل أن يتدخل محمد صلاح لتهدئة الأجواء وتحفيز اللاعبين.

وقال لاشين، خلال ظهوره مع الإعلامي إبراهيم فايق عبر قناة MBC مصر، إن حسام حسن لا يتقبل الخسارة بطبيعته، موضحًا: " الشوط الأول انتهى وإحنا خسرانين 1-0، دخلنا غرفة الملابس وكابتن حسام طبعًا مبيحبش الخسارة.

الناس فاكرة إن الكرباج اشتغل، لكن كان فيه جزء عصبية لأنه دي شخصيته".

وأضاف: " كان فيه عقل من الكابتن حسام ومن محمد صلاح، الكابتن حسام خد جنب دقيقتين علشان يهدا، وهنا صلاح اتدخل وقال لنا: يا جماعة إحنا مبنهزرش، اللي إحنا فيه دلوقتي فيه شعب وفيه ناس مستنية أول مكسب لمصر، مينفعش سقف الطموح اللي اتبنى بعد مباراة بلجيكا يضيع النهارده".

وأوضح لاشين أن كلمات قائد المنتخب كان لها تأثير كبير على اللاعبين، قبل أن يعود حسام حسن للحديث مع الفريق بهدوء، قائلًا: " كابتن حسام بدأ يهدا، وبدأ يتكلم معانا ويغير أدوارنا ويقولنا إحنا محتاجين إيه في الشوط التاني".

واختتم لاعب منتخب مصر تصريحاته بالتأكيد على أن اللاعبين شعروا بحجم المسؤولية قبل العودة إلى أرض الملعب، مضيفًا: " بين الشوطين وإحنا خارجين كنا بنتكلم مع بعض ونقول هو إحنا بجد هنخسر في كأس العالم؟ وكان فيه لاعيبة حست بالمسؤولية ومستنية تنزل الشوط التاني تصلح اللي حصل وتعوض التقصير".