حرصت رنا أبو طالب طليقة الفنان محمود حجازي على الرد على تصريحاته المثيرة بأنها تمنعه من رؤية نجله وذلك من خلال بيان رسمي عبر موقع التواصل الاجتماعي “فيس بوك”.
جاء في البيان، “أنا رنا طارق زوجة محمود حجازي، وللأسف لازم كل يوم ألاقي اتّهام جديد صادر منه، وحابة أوضّح كام نقطة مهمة، هو بيقول إن مهما حصل مش هيشيل منع السفر، أنا عمري ما طلبت منه يشيل منع السفر، واللي متمنّع من السفر أصلا ابنه.
د، ابنه ده مش عايش معاه، ولا هو مسؤول عنه، ولا بيسأل عليه، ولا بيصرف عليه، وبقالّي 5 شهور عايشة مع ابني في مكان تاني في مصر، بصرف على نفسي وبصرف على ابني لوحدي”.
أضاف، “لو كنت عايزاه يشيل منع السفر، كنت أخدت الاتفاق اللي عرضه عليّ من كام شهر لما طلب مني فلوس مقابل إنه يشيله، وأنا كنت ممكن أدفع له الفلوس دي، ما أنا ياما صرفت، أنا قاعدة في مصر علشان قضية الضرب بتاعتي، علشان آخد حقي بعد ما إدّاني علقة موت لما واجهته بالعلاقات النسائية، وعندي جلسة يوم 21 فبراير”.
تابع البيان، “أنا جيت مصر بإرادتي وجبت له ابنه، وأنا متحمّلة كل المصاريف علشان يشوف ابنه، وعلشان أهله يشوفوه، هو نفسه كان عاملي بلوك وأنا في أمريكا، ومبيسألش على ابنه، ده حتى أنا عاملاله فيزا لأمريكا بـ 5 سنين، وهو مجاش يشوف ابنه، وبرغم كده جبتهوله على أمل إنه يفوق ويتغيّر، ولما وصلت مصر اكتشفت مصايب: علاقات نسائية، ولايفات على التيك توك بالساعة، وحاجات مشبوهة”.
وأكمل، “ولما واجهته بعلاقاته النسائية المتكررة وطلبت الطلاق، اعتدى عليّا وكنت هموت، وأنا وقّفت إجراءات الجنسية ليه لما اكتشفت العلاقات دي، وده ضايقه أكتر مني، وأنا رافعة عليه قضية طلاق، علشان برضه لما طلبت الطلاق، طلب مني فلوس بالدولار، فبرضه قاعدة في مصر علشان القضية دي كمان”.
واختتم، “هو بيقول إن أهله مشفوش ابنه، أنا عمري ما منعت حد منهم يشوف الولد، بعد ما ضربني، قلت لهم إني مقدرش أجيب ابني في بيوت أو أماكن مُغلقة وهو موجود، خوفًا إنه يتعدّى عليّا تاني، وخوفًا على ابني منه، وأهله مش بيقدروا عليه.
، وهو قالّي إنه ملوش كبير، وهما بنفسهم بيشتكوا منه وبيقولوا إنه بيتصرّف من دماغه وإنه عصبي جدًا، فإزاي أروح برجلي للشقة اللي كنت هموت فيها؟ ، قلت لهم أهلًا وسهلًا في أي مكان عام… وهما رفضوا واختفوا”.
التعليقات (0)
لا توجد تعليقات حتى الآن. كن أول من يعلق!
أضف تعليقك