مستشار رئاسة الوزراء لـ«كلم ربنا»: الله اختبرني في أغلى ما أملك

قال الكاتب الصحفي هاني يونس، المستشار الإعلامي لرئاسة مجلس الوزراء: «ربنا عمري ما روحت له مكسور إلا وجبرني، كلنا بنتعرض لمواقف شخصية ومهنية، وأنا انكسرت كتير، ولما الطرق بتتقفل بينا ومش بنلاقي حل، بنرجع لباب ربنا، الباب اللي عمره ما بيتقفل»، مضيفًا: «أنا بكلم ربنا كتير، وعمره ما خذلني».

وأضاف «يونس» خلال حواره في برنامج «كلم ربنا» مع الكاتب الصحفي أحمد الخطيب المذاع عبر الراديو 9090: «عندي أربع بنات، والتانية منهم اسمها هايا، بعد الولادة بأيام لاحظت حاجة غريبة في رجلها، وروحت لدكتور اللي صدمني بكلامه وقال: دي عندها عيب خلقي، وممكن نوصل في مرحلة للبتر وهي لسه طفلة رضيعة، فنزلت من عنده وأنا منهار، وببكي ومش قادر أسوق، ومش بقول غير يا رب».

واستطرد: «وقتها عرفت إن في علاج بألمانيا، وبدأت أرتب نفسي، لكن بالصدفة لقيت خبر عن رئيس جمعية جراحي العظام، ولقيته متخصص في الحالة دي، وروحت له وشرح لي خطة العلاج وقال: هنعمل أربع أو خمس عمليات لحد ما توصل 15 سنة كويسة، فلقيتني بكلم ربنا وأتحايل عليه وأترجاه، وأقوله: (يا رب متبتلنيش في بناتي، ابتلائي وجبري وثروتي في بناتي)».

وأشار إلى أن ابنته الكبرى تعرضت لحادث اختناق غاز في الحمام، مضيفًا: «لقيت مراتي بتقول إن البنت مبتردش، فضلت أخبط وأنا مهدود ومرهق لغاية ما كسرت باب الحمام، لقيتها مغمى عليها، خدناها على المستشفى وأنا روحي رايحة، فضلت واقف جنبها لحد ما فاقت، وأنا في اللحظة دي اتشهدت من الفرحة، حسيت إن روحي رجعت لي تاني، والحمد لله ربنا جبرني، وهي دلوقتي في كلية صيدلة، وده فضل من ربنا».

كما كشف «يونس» عن معاناة ابنته «عالية»، إحدى التوأم، التي شك الأطباء في إصابتها بضمور في المخ، لكنه واصل رحلة العلاج الطبيعي والدعاء، ووقتها ذهب للحج ودعا الله، وبعد عودته بأسبوع تمكنت من المشي وحققت تفوقًا دراسيًا، قائلاً: «كنت دايمًا أقول لربنا: ما تخذلنيش في ولادي، والحمد لله ربنا ابتلاني وجبرني، ومشيت وبقت متفوقة»، متابعا: «ربنا أكرمني وجبرني فيهم كلهم، وحكمة الابتلاء هي أنه يختبر صبرك، ويديك عشان يشوف هتشكر ولا لأ».