محمد يوسف "أوزو" عن إصابته بمرض مناعي نادر

كشف الممثل محمد يوسف، الشهير بـ" أوزو"، عن تفاصيل حالته الصحية عبر منشور مطول على حسابه الشخصي بموقع “فيس بوك”، وذلك ردا على التعليقات المتكررة بشأن شكل ظهره والطريقة التي يمشي بها.

وأوضح أوزو قائلًا: “بسم الله الرحمن الرحيم.

اسمى محمد يوسف محمد شرف.

والشهرة اوزو.

بشوف تعليقات كتير على موضوع ضهرى والله بصوا ياجماعة أنا فعليا من النوعية اللي مبحبش الصعبانيات ولا عمرى حبيت أكسب تعاطف الناس والجو الرخيص دا وكتير من الناس غير القريبين منى ميعرفش موضوع المرض اللى عندى”.

وتابع: “أنا عندى مرض مناعى نادر اسمه ankylosing spondylitis التهاب الفقرات التصلبى وملوش علاج وكل اللى اقدر اعمله اخد العلاج البيولوجي بتاعى عشان يبقى الحال على ماهو عليه وحتى حاولت اروح لدكتور متخصص عشان أعمل عملية تجميل ومن كتر ما هو دكتور مشغول راح معايا دكتور أشرف ذكى ودخلته بعد ٨ ساعات انتظار فى العيادة والباشا كشف وقالى تعالى بعد سنة”.

وأضاف: “مع العلم ان العملية دى هتحتاج من ٤ ل٦ شهور بعدها عشان ارجع طبيعى طب السؤال هنا هل أنا مش عاوز اعملها؟ ؟ لأ عاوز اعملها بس اكيد مع دكتور مهتم بحالتى مش بيشوف جدوله فاضى امتى هل مش مسببالى تعب؟ أنا من كتر الالم المخ بطل يبعت إشارات بالألم طب هل أنا مبسعاش انى احسن دا؟ لما ربنا بيكرم بروح اعمل علاج طبيعى مانيوال وعلاج مائى وبالمناسبة العلاج الطبيعى المانيوال دا عذاب”.

واختتم حديثه قائلًا: “فطبعا أنا آسف لو حضرتك مش عجبك مشيتى او شكل ضهرى بس والله دا مش هعرف اعمل حاجة فيه لحد ما ربنا يأذن.

اسف للاطالة بس وجب التوضيح.

ورغم كل دا الحمد لله رب العالمين على كل حال”.

مشاركات محمد يوسف في رمضان 2026.

ويشارك محمد يوسف “أوزو” في موسم دراما رمضان الحالي من خلال عملين بارزين، هما مسلسل سوا سوا، إلى جانب مشاركته في مسلسل صحاب الأرض، حيث يجسد شخصية أبو علي الصديق المقرب من ناصر، الذي يؤدي دوره الفنان إياد نصار.