المخرجة روجينا بسالي تشيد بريهام عبدالغفور في مسلسل حكاية نرجس

أشادت المخرجة روجينا بسالي، عبر حسابها الرسمي على «فيسبوك»، بأداء ريهام عبدالغفور في مسلسل حكاية نرجس، وكتبت روجينا: «ريهام عبد الغفورلما بتتحط في دور صعب، بتختار له منطقة مختلفة بعيد عن المتعارف عليه».

وأضافت: «شخصية نرجس صعبة ومركبة، لكنها ماراحتش للشر التقليدي بتاع التشنجات ونفخ العروق، راحت للشر الهادي اللي جوه، الأفعى أو الحية الناعمة، ملامحها بتتبدل في لحظة، في مشاهد الغواية وفرض السيطرة يظهر الخبث والمكر، وفي لحظة تانية تضعف وعينيها تنور قصاد الطفل الصغير.

عارفة تغوي وتسيطر، وعارفة تكون أم عندها مشاعر، كل حاجة عندها محسوبة ومحسوسة، واخدة بالها من أدق التفاصيل».

وتابعت: «إحنا مش متعاطفين مع نرجس، إحنا مصدقين الممثلة اللي بتعمل نرجس، لأنها هي نفسها مصدقة الشخصية ومش بتحكم عليها.

صادقة ومخلصة ووفية لشغلها، بتحترم مهنتها وجمهورها، بتسيب شغلها هو اللي يتكلم، وده اللي بنى ثقة كبيرة بينها وبين الجمهور، من أهم وأنضج الممثلات عندنا، ممثلة عظيمة، ممثلتي المفضلة أستاذة ريهام عبد الغفور».

يضم مسلسل حكاية نرجس كلا ريهام عبدالغفور، وحمزة العيلي، وسماح أنور، وعارفة عبدالرسول، وبسنت أبو باشا، وأحمد عزمي، ومن تأليف عمار صبري، إخراج سامح علاء.