سحر رامي: نادية لطفي الأقرب إلى قلبي وتتميز بالأناقة والبساطة

كشفت الفنانة سحر رامي عن اسم الفنانة التي تعتبرها الأقرب إلى قلبها من نجمات الزمن الجميل، مؤكدة أنها تستلهم منها أسلوبها في الأزياء والإطلالة، وذلك خلال استضافتها في أحد البرامج الإذاعية، حيث تحدثت عن محطات عديدة من مشوارها الفني.

سحر رامى تكشف عن فنانتها المفضلة في الزمن الجميلوقالت سحر رامي إن الفنانة نادية لطفي تعد أكثر نجمات الزمن الجميل اللاتي يعجبنها، خاصة من ناحية الأناقة والبساطة، مشيرة إلى أنها تحرص على ارتداء أزياء مستوحاة من موضة الخمسينيات والستينيات.

وأضافت: «نادية لطفي أكتر حد بيعجبني في ممثلات زمان في الاستايل بتاعهم، أنا لما بروح النادي لابسة حاجات الستينيات والخمسينيات دايما بحب ألبس اللبس ده، بروح الصبح أقولهم أنا النهارده نادية لطفي مش سعاد حسني.

معظم الناس بتحب سعاد حسني، وأنا بحبها وكل حاجة، بس بحب نادية لطفي أكتر لأنها طبيعية، مفيش رموش ولا باروكات زي اللي كان بعض الممثلات بيعملوه، لكن نادية لطفي حلاوتها مش على حد».

وتابعت: «وبحب كمان مديحة يسري وشادية، وكل واحدة ليها شكل وستايل مميز، ومعظمهم كانوا طبيعيين، لكن جت فترة في السبعينيات بقت الرموش والباروكة موضة، والدنيا كانت كده حتى بره مصر».