قال الكابتن أحمد حسن، نجم منتخب مصر والأهلي السابق لبرنامج" أكتر حاجة" الذي تقدمه الإعلامية خلود نادر على إذاعات راديو النيل، عن العديد من الجوانب الشخصية والمهنية في حياته، في حوار تحت عنوان" أكتر حاجة".
بدأ أحمد حسن حديثه بالتعبير عن علاقته بالجماهير، قائلاً: " حب الناس أكتر حاجة بتفرحني، وأكتر كلمة بحب أسمعها اللقب بتاعي لقب الصقر، لأن ده اللي عاش معايا في الملاعب، ودي من الحاجات اللي ببقى مبسوط بيها".
وعن صفاته الشخصية، أضاف: " أكتر حاجة بحبها فيا إني متسامح، وأكتر صفة أحب تكون موجودة في صحابي إنهم يكونوا بيحبوني من قلبهم".
وفي سياق حديثه عن القرارات المصيرية، قال: " أكتر قرار أخدته وأنا مبسوط الأندية الكتير اللي لعبت فيها، منها النادي الأهلي وقرار جوازي".
وكشف عن أكثر اللحظات التي يود العودة إليها، مضيفاً: " أكتر لحظة اتمنى أرجعلها تاني وأنا صغير أو في فترة وجود والدي، لأني بعد غيابه بقيت دايما بحس إن في حاجة ناقصة في حياتي، في كل النجاحات اللي حققتها".
وعن الجانب العائلي، أوضح أحمد حسن أن" أكتر نقطة ضعف في حياتي هي ولادي، عندي ولدين وبنت".
كما كشف عن أمنيته في الفترة المقبلة، قائلاً: " أكتر مكان نفسي أسافرله الفترة الجاية هي مكة، أتمنى إني أعمل عمرة".
وعن سر نجاحه، قال: " أكتر حاجة اشتغلت عليها عشان أوصل للمكان اللي أنا فيه دلوقت الإصرار".
وعن الدعاء الأقرب إلى قلبه، أضاف: " أكتر دعاء قريب لقلبي الدعاء بالستر والصحة".
وفي حديثه عن الشهر الكريم، قال أحمد حسن: " أكتر عادة رمضانية بحبها الحفاظ على الصلاة في المسجد".
وأضاف عن ذكرياته مع الشهر: " أكتر ذكرى بتيجي في بالي أول ما رمضان ييجي هي والدتي طبعا، وأكيد فانوس رمضان".
وعن أكلة رمضانية مفضلة، كشف: " أكتر أكلة بحبها أعملها طاجن البامية، وأنا أصلا بحب المطبخ وبعرف أعمل أكل كويس".
وعن تأثره بفيلم معين، قال: " أكتر فيلم أثر فيا أحمد زكي النمر الأسود أثر في مستقبلي الكروي كمان".
وعن البلد الأقرب لقلبه بعد مصر، أضاف: " أكتر بلد حبيتها بعد مصر هي تركيا، لأني عشت فيها فترة الشباب بتاعتي كلها".
وعن رغبته في تغيير عادة معينة، قال مازحاً: " أكتر حاجة نفسي تتغير الفترة اللي جاية في حياتي هي إني أرجع أنام بدري تاني زي زمان".
وعن القيم التي يغرسها في أبنائه، أضاف: " أكتر حاجة بركز أعلمها لولادي إنهم يكون عندهم عادات وتقاليد".
وعلى الرغم من انتماء عائلته للنادي الزمالك، قال أحمد حسن: " أكتر نادي قريب لقلبي النادي الأهلي، رغم إن العيلة عندي كلهم زملكاوية".
وعن أكثر الأشخاص دعماً له، أضاف: " أكتر شخص كان داعم ليا في كل أوقاتي الصعبة زوجتي ووالدتي وأخواتي، وابن عمي ده معايا من وإحنا صغير، فكل مرحلة ليها الناس الداعمين ليا فيها".
وعن أكثر الأمور التي يندم عليها، قال: " أكتر حاجة ندمت عليها إني سيبت الملعب وكان ممكن إني أقدر أكمل على الأقل 4 سنين كمان".
وعن اللاعبين الذين يستمتع بمشاهدتهم، أوضح: " أكتر لاعب بيمتعني أداءه إمام وعبدالله السعيد".
ووجه رسالة إلى إمام عاشور، قائلاً: " بقول لإمام نصيحة ما تستعجلش وركز في الملعب، أنت ربنا مديك موهبة كبيرة استغلها طول ما إنت جوا الملعب".
واختتم أحمد حسن حديثه بالتأكيد على دور المدرب الراحل محمود الجوهري في مسيرته، حيث قال: " أكتر مدرب أثر في شخصيتي كابتن محمود الجوهري، هو السبب اللي خلاني أعرف يعني إيه تحب مهنتك وتشتغل على نفسك".
التعليقات (0)
لا توجد تعليقات حتى الآن. كن أول من يعلق!
أضف تعليقك