أكد محمود حجاج مؤلف مسلسل" درش"، أن كتابته للمسلسل تمت في وقت قياسي، نظرا للحاق بعرضه في شهر رمضان المبارك، كما أشار بأنها كانت تجربة ممتعة له بشكل كبير.
جاءت تصريحات محمود حجاج لبرنامج اللمة تحلى مع بيريهان زهير على إذاعة شعبي إف إم، على النحو التالي: كتابة مسلسل «درش» حصلت في وقت قياسي جدًا، رغم إن كان فيه ارتباط بعمل تاني قبل المسلسل، لكن المشروع ده وقف فجأة، فكان لازم أبدأ بسرعة علشان نلحق موسم رمضان.
الفترة دي كانت كلها شغل متواصل، وعزل تام عن أي حاجة حواليا، حتى عن البيت والأولاد، وكل التركيز كان في كتابة الحلقات علشان الـ30 حلقة يخلصوا قبل بداية التصوير.
الهدف كان إن الحلقات تكون جاهزة بدرجة كبيرة علشان فريق العمل يبقى فاهم مسار الأحداث، خاصة إن المسلسل فيه تفاصيل وتشابكات كتير محتاجة وضوح لكل الناس اللي شغالة فيه.
التعاون مع الفنان مصطفى شعبان كان مؤجل بقاله حوالي أربع سنين، بعد أكتر من مشروع كان ممكن يجمعنا لكن ما حصلش نصيب بسبب ارتباطات مختلفة، لحد ما الظروف جمعتنا أخيرًا في «درش».
تجربة" درش" كانت ممتعة جدًا لأن مصطفى شعبان فنان مجتهد وملتزم جدًا في شغله.
اختيار منطقة العطارين كمكان رئيسي للأحداث كان بالتفكير المشترك مع المشرف العام على العمل عمر درديري، لأن فكرة المسلسل فيها طابع ساسبنس مختلف شوية عن الأعمال اللي متعود عليها جمهور مصطفى شعبان، فكان لازم يبقى فيه مكان مصري أصيل وقريب من روح الشارع علشان الجمهور يفضل مرتبط بالحكاية.
المسلسل فيه مفاجآت مستمرة لحد أخر حلقة، وكل شوية الأحداث بتاخد اتجاه مختلف يخلي المشاهد يحاول يتوقع الحقيقة، وده جزء من متعة العمل.
متابعة تحليلات الجمهور على السوشيال ميديا بقت حاجة ممتعة جدًا بالنسبة لي، لأن في ناس بتجتهد وتطلع توقعات كتير عن شخصية «درش» ونهاية المسلسل، وده بيخلي التفاعل مع المسلسل يزيد يوم بعد يوم.
التعليقات (0)
لا توجد تعليقات حتى الآن. كن أول من يعلق!
أضف تعليقك