حل الفنان أحمد عيد ضيفا على تليفزيون اليوم السابع، خلال مداخلة هاتفية تحدث فيها عن عدد من أعماله الفنية السابقة والمستقبلية ورؤيته لعدد من الأمور، وكذلك تطرق للحديث عن مسلسله" أولاد الراعى"، والذى نافس به خلال موسم دراما رمضان وعرض على قنوات الشركة المتحدة.
أحمد عيد: نديم الراعى كان شخصا لعوبا وبخيلا مش صاحب شر مطلققال الفنان أحمد عيد، إنه حرص على تقديم شخصية" نديم الراعى" في مسلسل" أولاد الراعى"، والذى عرض خلال موسم دراما رمضان الماضى على قنوات الشركة المتحدة للخدمات الإعلامية، بشكل مختلف بحيث لا تكون شريرة بشكل مطلق، حيث أوضح خلال حواره في تليفزيون اليوم السابع مع الكاتب الصحفى عمرو صحصاح: " لم أقصد تقديم الشر في أولا الراعى، عشان التجربتين اللى قبل كدة في مسلسلى" عملة نادرة" و" الحشاشين"، كنت بعمل شرير صرف".
وأضاف عيد قائلا: " في المسلسل ده" نديم الراعى"، مش شرير بقدر إنه شخصية لعوبة عندها تكبر وغرور وكمان بخيل، وده خلاه شرير بدم خفيف، فالشخصية مش قاسية مية في المية ولا طيبة مية في المية".
أحمد عيد: ما بتفرقش معايا البطولة المطلقة أو الدور التانى والتالتاعتبر الفنان أحمد عيد الدور المميز هو المكسب الحقيقى له سواء كان هذا الدور هو البطولة أم الدور الثانى أو الثالث في العمل الفنى المعروض عليه، حيث قال فى حواره مع تليفزيون اليوم السابع: " البطولة المطلقة أو الدور التانى ما بقتش تفرق معايا.
ما عنديش مشكلة أشتغل بطولة جماعية أو بطولة تانية مع نجم أكبر منى أو بطولة تالتة مع نجمين أكبر منى.
إيه المشكلة عادى.
الموضوع ده مش فارقلى نهائي".
وعن أعماله المقبلة، قال الفنان أحمد عيد في حواره مع تليفزيون اليوم السابع: " عندى فكرة كدة ومشروع لمسلسل اجتماعى كوميدى أتمنى تقديمه، بيتكلم عن مشاكل الواقع اللى إحنا فيه ده.
يكون فيه شوية صراحة كدة نتكلم فيه عن مشاكلنا بإحترام فمستنى المنتج المناسب اللى يتحمس لفكرة المسلسل اللى عندى.
مش عارف فيه منتج هيتقبله أم لأ.
عايز أعمل مسلسل اجتماعى كوميدى أنتقد فيه المجتمع ولكن بشكل محترم.
عندنا مشاكل كتير فى الحياة محتاجين نتكلم عليها شوية بشكل كويس وبشكل كوميدى.
أحمد عيد: ما بشتغلش الفن أكل عيش ولو مفيش حاجة عجبانى ببعد وأقعد فى البيتأوضح الفنان أحمد عيد سبب اخفتائه عن الساحة الفنية لفترات متباعدة قبل عودته من خلال مسلسل" الحشاشين"، مع الفنان كريم عبد العزيز، ومن قبله مسلسل" عملة نادرة"، مع الفنانين نيللى كريم وجمال سليمان، حيث قال خلال حواره في تليفزيون اليوم السابع: " بصرحة الفترة اللى فاتت كنت بعيد لأسباب خاصة بى.
يعنى مش بقيت مش شغوف للعمل لكن مابقتش أعمل حاجات معينة وتبقى مش بتضيفلى حاجة".
وأضاف عيد فى حواره: " مش حابب الموضوع يبقى بالنسبة لى أكل عيش، لإنى مش بتعامل مع الفن كده، والله أعلم بالسبب مش عارف بقيت ليه كدة نفسيا".
وتابع النجم أحمد عيد في حواره: " الشغل بالنسبة لى بعتبره بقى هواية، مش احتراف، أنا دلوقتى بعتبر نفسى بشتغل كهاوى، فيه ناس بتشتغل عشان لازم تشتغل عشان عندها متطلبات وظروف مادية.
الموضوع قل عندى شوية، لكن بحاول برضه بقدر الإمكان أن أتواجد، مش هتوارى يعنى وأروح أختفى، أنا موجود يا جماعة إذا لقيت حاجة كويسة هشتغلها، ما لقتش هستنى السنة اللى بعدها مش مشكلة".
سر اختفاء الفنان أحمد عيد قبل مسلسل" عملة نادرة" والذى عرض فى موسم دراما رمضان 2023وعن أسباب اختفائه قبل موسم دراما رمضان 2023، قال الفنان أحمد عيد: " الحكاية ساعات الواحد بييجى عليه وقت معين بيكون ليه تركيبة معينة من الناحية النفسية والسلوكية، حتى لما بيجيلى شغلانة بهيأ نفسى ليها وأشتغلها بركز فيها وخلاص فأقفل تليفونى، ما بعرفش أعمل تلاتين ألف حاجة".
أحمد عيد: عندى فوبيا من الظهور على الفضائيات بسبب التدخلات في حياتى الشخصيةقال النجم أحمد عيد إن مسألة عدم ظهوره في البرامج سواء على الفضائيات أو على السوشيال ميديا، بسبب ما يفعله البعض من التدخل في حياته الشخصية أو إدخاله في مواضيع لا يريد الحديث فيها معلقا: " الموضوع ده مزعل منى ناس كتير ما أعرفش ليه بقى عندى فوبيا إنى أطلع في برنامج أتصور فيه أو أى حد يصورنا فى أى حاجة".
وأضاف عيد خلال حواره مع تليفزيون اليوم السابع، أنه على سنين متفاوتة تظهر له مقاطع على السوشيال ميديا عندما يراها يندم أنه تحدث فيها، معلقا: " مرة نزلوا ليا مقطع قالوا أحمد عيد مش بيسلم على كومبارسات، تفتح الفيديو تلاقينى بسلم وأتصور عادى".
وتابع عيد خلال حديثه قائلا: " التدخل أيضا في حياتى الشخصية أزعجنى، أجد ناس تعلق على ظهورى وتقول: " هو لابس ليه كدة؟ ! هو عامل كدة ليه؟ !
فخلاص مش طالع خالص".
وأوضح عيد أنه أصبح مشغولا بظهوره أمام كاميرات التمثيل فقط، معلقا: " بقيت حابب أطلع أمثل فقط، وما أطلعش فى أى حاجة، بعد العمل ما يتعرض كدة علاقتى انتهت بيه".
وأكد عيد أنه عقب ظهوره في مسلسل" الحشاشين"، منذ عامين حصل على العديد من الجوائز في عدة مهرجانات فنية، ولكنه رفض الظهور فيها، لأنه يرغب في التواجد أمام الكاميرات كممثل فقط وداخل لوكيشنات التصوير فقط".
أحمد عيد: كنا بنحضّر جزء ثاني من فيلم ثقافى ولكن توقف لهذه الأسبابأكد الفنان أحمد عيد أن الأقاويل التي ترددت مؤخرا عن تقديم جزء ثان من فيلم" فيلم ثقافى"، حقيقية، حيث دخلت بالفعل منذ فترة حيز التحضيرات ولكن لم تكتمل، خاصة أن المؤلف والمخرج محمد أمين مقل في التواجد ويعمل على مضض، حيث قال عيد في حواره لتليفزيون اليوم السابع: " فعلا اتكلموا وقعدنا وفجأة توقف ومحدش جاب سيرته تانى، فلما لقيت كدة ما فتحتش الموضوع معاهم تانى.
سكتوا فجأة مفيش حس ولا خبر".
وعن إمكانية تكرار التعاون مع الفنان أحمد رزق، بعدما قدم الاثنان فيلمين ناجحين هما" فيلم ثقافى" و" أوعى وشك"، قال الفنان أحمد عيد: " ياربت أتمنى أتشغل تانى أنا وأحمد رزق وفتحى عبد الوهاب لكن مفيش حد جه قالنا تعالوا أشتغلوا ما بعرفش أجرى لمنتج وأقوله تعالى نعمل شغل".
أحمد عيد: محمود حميدة وزينة معايا في محطتى السينمائية المقبلةتحدث الفنان أحمد عيد عن أحدث أعماله الفنية، بعد سؤاله عن جديده في عالم السينما خلال حواره في تليفزيون اليوم السابع حيث قال عن الفيلم الذى يحمل اسم" الشيطان شاطر": " لسة فيه 3 أيام تصوير ما أتعملتش، ومعايا في العمل زينة ومحمود حميدة ومحمد أنور وأحمد الحجار مجموعة كويسة جدا، تأليف لؤى السيد، وإخراج عثمان أبو لبن، ومش عارف ليه سكتوا برضه على الأيام المتبقية دى هما 3 أيام في السينما مش قليلين".
يذكر أن آخر أعمال الفنان أحمد عيد مسلسل" أولاد الراعى"، حيث تقاسم البطولة مع الفنانين ماجد المصرى وخالد الصاوى وعدد آخر كبير من الفنانين منهم نرمين الفقى، أمل بوشوشة، إيهاب فهمى، نوران ماجد، إيناس كامل، فادية عبد الغنى، محمد عز، نوليا مصطفي، شادى مقار، غادة طلعت، كريم عبد الخالق، وآخرين، وهو من تأليف ريمون مقار، مينا بباوي، وخالد شكري، ومحمود شكري، وطه زغلول، إخراج محمود كامل، وإنتاج شركة فنون مصر، وعرض على قنوات الشركة المتحدة.
التعليقات (0)
لا توجد تعليقات حتى الآن. كن أول من يعلق!
أضف تعليقك