في ورشة بسيطة يختلط فيها صوت الأدوات برائحة الخشب وأشكال الزجاج المختلفة تقف أسماء المسيري من محافظة الإسكندرية والتي تبلغ من العمر 35 عامًا بثقة وذكاء إمرأة تحدت كل الظروف والصعوبات التي واجهتها لتمارس عملا اعتاد المجتمع أن يراه حكرا على الرجال، ولم تنتظر الفرص بل صنعتها بنفسها بداية من شغفها بالفن خلال دراستها بكلية الفنون الجميلة وصولا إلى امتلاك ورشة متكاملة للنجارة والزجاج.
وفى حوار مع اليوم السابع معها قالت أسماء المسيرى، " بدأت العمل مبكرا خلال دراستى الجامعية وكنت بتعلم من أساتذتى في الجامعة وبحرص جدا إنى أروح ورش نجارة عشان اتعلم، وبعد التخرج بدأت بالفعل في تنفيذ أعمال فنية بسيطة من منزلى وكنت بعرضها للبيع في المحلات لاختبار مدى تقبل الجمهور، كنت بصنع مشغولات بسيطة مثل اللوحات والمشغولات الزجاجية والفسيفساء".
وأضافت المسيرى، " ردود الفعل الإيجابية من العملاء شجعتنى على الاستمرار، عشان كد قررت إنى أفتح ورشة لنفسى وده كان من 13 سنة بدأت فيها لوحدى اعتمدت على التعلم الذاتي واكتساب الخبرة من خلال حضور ورش تدريبية في مجال الزجاج والنجارة، و كنت بروح الورش وأتعلم إزاي الزجاج بيتقطع ويتصنفر وإيه هي أنواعها وأشكاله، وكمان تابعت شغل النجارين ووقفت أتفرج على تفاصيل المهنة لحد ما فهمتها، المرايا كانت من أكثر المنتجات المطلوبة عشان كده حبيت اتخصص فيها أكتر وأعرف كل تفاصيلها وأنواعها.
ومع الوقت تمكنت أسماء من تطوير مهاراتها، لتنتقل من شراء الخامات الجاهزة إلى تصنيع منتجاتها بالكامل، بداية من تجهيز الخشب وحتى تنفيذ الأعمال الزجاجية، ولكن لم يكن الطريق سهل إذ واجهت تحديات اجتماعية بسبب طبيعة عملها في ورش يسيطر عليها الرجال.
وعن الصعوبات التي واجهتها قالت أسماء، " كنت بشتغل في الشارع وفي وسط ورش كلها رجالة وده خلى في اعتراضات كتير من الناس حواليا، لكن كنت مؤمنة بنفسي وباللي بعمله، لكنى كنت واثقة في نفسى وطالما الإنسان شايف إنه بيعمل حاجة صح، لازم يكمل وميسمعش لكلام الناس".
وأنهت حديثها قائلة، انا حاليا عندى ورشتى الخاصة وعندى صفحات على السوشيال ميديا والناس بتحب شغلى جدا واللى بيساعدونى في الورشة هما ولادى الصغيرين، والحمد لله مكملة حلمى اللى بدأته من أكتر من 13 سنة".
التعليقات (0)
لا توجد تعليقات حتى الآن. كن أول من يعلق!
أضف تعليقك