اليوم الصباح، كنت موجود في السوق وشفت بعيني محاولة تمرير “سلع فاسدة” للمواطنين… لحظة تخليك تفهم قداش صحة التونسي رخيصة عند البعض اللي ما يهمّهم كان الربح على حساب كل شيء.
أسماك متعفّنة ومتحلّلة، ريحتها جيفة تخنق، وعظم حوت متقرطسة وسط ساشيات، كحلة، مستخضرة، باين عليها التعفّن، وريحتها زفرة تقطع النفس.
غير صالحة للمشاهدة موش للاستهلاك.
بالحق المشهد كان صادم بكل المقاييس.
والأخطر من هذا الكل، أنّو السلعة هاذي كانت باش تدخل للسوق في شكارة، باش تتباع بشكل عادي، لولا تدخّل فريق المراقبة والبيطري وإدارة السوق والشرطة البلدية بصفاقس في الوقت المناسب وحجزهم لها…وبالحق تحية تقدير كبيرة ليهم على اليقظة والتدخّل السريع.
وراهو اللي صار اليوم موش “غلطة” كيما حاول البعض تبريره… بل هو جريمة وإرهاب غذائي، وجشع بلا حدود.
فصحة المواطن خط أحمر، ويجب فرض محاسبة صارمة وردع حقيقي حتى لا تتكرر مثل هذه الكوارث.
🔸اعدكم أني ساتابع الموضوع، لكن السؤال اللي ما لقيتوش اجابات لحد الآن: كم نحتاج من رقابة ومراقبة لنضمن أن كل ما يصلنا من مواد وسلع ولحوم وأسماك و خضر و غلال صالحة للاستهلاك ولا تمثل خطرا على حياتنا؟
التعليقات (0)
لا توجد تعليقات حتى الآن. كن أول من يعلق!
أضف تعليقك