كودار يرد على “اتهامات الثراء”: أراو ليا هاد الثروة ونشرح لكم منين جات… كل ممتلكاتي قانونية ومصرح بها

نفى سمير كودار، رئيس جهة مراكش-آسفي وعضو المكتب السياسي لحزب الأصالة والمعاصرة، صحة الاتهامات التي تلاحقه بشأن الاغتناء غير المبرر، متحدياً منتقديه أن يقدموا دليلا على ما يصفه بـ”الادعاءات” المتعلقة بثروته وممتلكاته.

وقال كودار، خلال استضافته في برنامج “بدون لغة خشب”، اليوم الجمعة (5 يونيو)، على “ميد راديو”، “بيين ليا الثراء اللي عندي ونقولك منين جا”، مضيفا: “أنا كنعطي التصريح بالممتلكات ديالي للجهات المعنية، آرا ليا هاد الثروة اللي كتدوي عليها، هاد الخيال، وشي حوايج سمعتهم وكنسمعهم فجرائد وكنقراهم، ما عنديش، عطوهم ليا… “عندو دار في ماربيا أراوها، إيلا لقيتيها عندي نكتبها لك، اللي لقيتي عندي من غير البيت ديالي وداك الشي نكتبوا لك”.

وتساءل كودار: “فين هاد الثروة؟ أرا ليا هاد الثروة ونشرح لك منين جات”.

واصفا كل ما يروج بشأن ثروته بـ”الادعاءات”.

وتابع عضو المكتب السياسي للبام: “عندي لمن كانديكلاري، عندنا المجلس الأعلى للحسابات اللي كنعطيوه التصريح، أنا ماجيتش هنا باش ندير التصريح بالممتلكات ديالي، ولكن إلا عندك شي حاجة كنمتلكها أراها ليا ونقول ليك منين جات باش نسالوا هاد الموضوع”.

وعن طبيعة عمله حاليا، قال كودار: “أنا خرجت تقاعد كإطار بالمكتب الوطني للكهرباء، والإدعاءات ديال راه كنت في لاراديما ولاراديس كنوزع الوراق، عمري ما خدمت لا في لاراديما في لاراديس، من الأول كنت فمكتب الكهرباء، وعمري ما وزعت وراق ولو كنت كنوزع الوراق كان غيكون شرف لي، هذه ماشي مهنه قدحية، ما عندي مشكل أنا نبيع حتى السردين في أسفي وشرف لي”.

وأوضح المتحدث: “أنا متقاعد كإطار في المكتب الوطني للكهرباء، وعمري ما خدمت لا فلاراديما ولا فلاراديس، ما وزعت لا وراق لا في الموطور لا جوج، ما عنديش الثروة اللي كيقولوا، عندي رزقي، عندي رزقي اللي مبرر كيف عندي، وما عنديش شي حاجة كنمتلكها غير مبررة”.

واعتبر كودار أن أصل المشكل هو “في الإعلام، وللي دار شي قناة، ولا اللي دار شي صفحة ولا دير شي موقع، ولا خصوصا داك الشي الفيسبوك، الاتهامات والسبان في أعراض الناس وفي حياتهم وفي أولادهم… وكاينين هاد الاتهامات المجانية”.

وقال ضيف “بدون لغة خشب”، “اللي عندو شي حاجة ينشرها، قالوا راه عندو الثروة! ! أرا ليا هاد الثروة اللي عندي، أنا نتمنى من الله تكون عندي، ويرزق الله من يشاء، هاد الثروة اللي كتدوي عليها بهذا الشكل أنا نقسمها معك”.

وأضاف: “كل ما أمتلكه هو قانوني ومصرح به، واللي كيقول شي حاجة من غير هادي البينة على من إدعى، يجبد ويبرر”.

وعن سبب ملاحقته بهذه الاتهامات، قال كودار: “ملي كتشتغل خاصهم ينتقدوك، ملي كدير شي حاجة خاصهم ينتقدوك، اللي كيديرو هاد الاتهامات سولهم هوما علاش كيلصقوها، أنا كنقول لك خاص غير يتحراو ما فيها باس، ودابا يمكن لك هذا الشي، سير للمحافظة يعطوك كاع الأملاك اللي عندي”.