وفاء عامر: فيه ناس ابتزونى لدفع 8 ملايين جنيه وقت اتهامى بتجارة الأعضاء

أكدت الفنانة وفاء عامر أنها تعرضت لابتزاز من عدة أشخاص في مبالغ تصل لـ 7 و 8 ملايين جنيه، وذلك عقب حصولها على حكم قضائى لصالحها ضد صانعة محتوى، حيث تم حبسها بعامين مع الشغل والنفاذ.

وقالت الفنانة وفاء عامر في تصريحاتها لتليفزيون اليوم السابع: " فيه منهم ناس كان بيبتزونى عشان ياخدوا منى 7 أو 8 مليون جنيه، وده مسجل.

منهم ناس محامين كانوا بيبتزونى.

ومش هسيب أى حد أبتزنى".

وأضافت عامر في تصريحاتها لتليفزيون اليوم السابع قائلة: " وفاء بيتقال عليها طيبة، لكن مايعرفوش إنى بعرف آخد حقى زيى زى أى ست مصرية محترمة.

لما تشوف أى حد غلبان تطبطب عليه.

لكن لو حد حاول يلمسها ويمد إيده عليها هتاكله بسنانها ودى أنا".

وفاء عامر: أنا زى أى مصرية حصلتلها مشكلة لجأت للقضاءوتابعت عامر حديثها لتليفزيون اليوم السابع قائلة: " أنا فرد من أفراد الشعب المصرى حصلتلى مشكلة لجأت للقضاء، فيه فئة من الناس مستكترين إزاى يبقى فيه نماذج محترمة في مصر.

والموضوع لطش في إبراهيم شيكا عشان هو معروف.

هما بينقوا الناجحين والمشهورين ويبتزوهم.

وبوجه رجائى لنقيب المحامين أن ينظر في كل الشكاوى اللى عنده.

وبشكر كل الناس اللى قالت كلمة حلوة واللى قالوا كلمة وحشة إلى مزبلة التاريخ.

كل حد أتكلم بدون وجه حق.

لكن الناس اللى أخدوا أحكام دول الرموز فيه ناس لسة خلف الستار".

واستكملت عامر حديثها لتليفزيون اليوم السابع قائلة: " مين اللى كان وراء الاتهامات اللى ضدى دى.

ناس بيجيبوا بعض.

وكنت أما أسأل ناس معارف محامين وأقولهم محدش بيستدعينى للتحقيق بعد كل الاتهامات دى.

يقولولى: هيجيبوكى إزاى وأنتى ماروحتيش أشتكيتى.

يعنى أنا حتى ما دخلتش قسم بوليس بعد كل الاتهامات دى ضدى".

وشهدت أزمة الفنانة وفاء عامر تطورات قانونية جديدة، بعدما حسمت المحاكم عددًا من الدعاوى المرتبطة بالشائعات والاتهامات التي طالتها عبر مواقع التواصل الاجتماعي خلال الفترة الماضية، في قضية أثارت اهتمامًا واسعًا بين الجمهور ورواد السوشيال ميديا.

وأكد المستشار القانوني للفنانة، هيثم حمد الله، صدور عدة أحكام قضائية لصالح موكلته ضد أشخاص اتهموا بنشر أخبار وادعاءات كاذبة تمس سمعتها، موضحًا أن إحدى القضايا انتهت بـ الحكم على صانعة محتوى بالحبس لمدة عامين مع الشغل والنفاذ، إلى جانب تغريمها وإلزامها بالمصاريف الجنائية.

وأشار إلى أن جهات التحقيق والمحاكم المختصة تعاملت مع الوقائع وفق الأدلة القانونية، ما أسفر عن صدور أحكام متعددة دعمت موقف الفنانة وأكدت عدم صحة المزاعم المتداولة بحقها.