أحمد موسى بعد أول فوز لمصر في المونديال: فرحونا وفرحوا العالم العربي كله

علق الإعلامي أحمد موسى، على فوز المنتخب الوطني على نيوزيلندا بثلاثة أهداف مقابل هدف في الجولة الثانية من دور المجموعات ببطولة كأس العالم 2026 المقامة حاليا في الولايات المتحدة الامريكية وكندا والمكسيك، وقال: «شكرًا رجالتنا، فرحونا وفرحوا العالم العربي كله، عاوزين من النهارده نوقف الاحتفالات، علشان المباراة القادمة أمام إيران، المباراة دي مهمة، لازم ندعي للمنتخب، زي ما صلينا اليوم الفجر ودعانا وربنا كرمنا».

المنتخب فاز عن جدارة واستحقاقووجه أحمد موسى، خلال تقديم برنامج «على مسئوليتي»، عبر قناة «صدى البلد»، الشكر إلى الجهاز الفني للمنتخب الوطني: «شكرًا يا كابتن حسام حسن، أول مرة نفوز في مباراة بكأس العالم، المنتخب الوطني فاز عن جدارة واستحقاق، أي كلام لينا يكون عن الشوط الثاني فقط، الشوط الأول كان حاجة والشوط التانية كان حاجة تانية، منعرفش إيه اللي حصل بين الشوطين».

وتابع: «محمد صلاح عالمي، ليه محمد صلاح عالمي زيه زي ميسي وكريستيانو؟ ، علشان بيستغل أنصاف الفرص، لمسة والتانية حط جون، أي وقت يكون محمد صلاح في المكان اللي بيحبه هتلاقي هدف، لاعيبة منتخب نيوزيلندا طوال جدًا، طوال زي النخل، بنلاعب نخل، الجون اللي جه فينا اللاعب بتاع نيوزيلندا طلع ارتفاع عالي وحطها جون».

وأكمل أحمد موسى: «110 ملايين كلهم وراء المنتخب، حتى لما دخل فينا هدف، كان عندنا ثقة كبيرة جدًا في العودة والفوز، مصر صعدت لدور الـ32 من بطولة كأس العالم بنسبة 97%، ومباراة إيران مهمة جدُا علشان نصعد كأول المجموعة، الكابتن حسام حسن والرجالة مهمتهم أننا نتصدر المجموعة».

وأضاف: «في منتخبات هتصعد كأفضل توالت في ترتيب المجموعات، ولكن هيصطدموا مع منتخبات تتصدر ترتيب المجموعات، اللي جاي صعب يا كابتن، ولازم نستغل كل الفرص، نلعب لعبنا قدام إيران، دول منتخب قوي جدًا، وقدموا مباراة كبيرة، وشطارة كابتن حسام حسن، إنه بيتعامل كل مباراة بمفردها».

أكد أحمد موسى: «التركيز مع المنتخب والمساندة ليهم، ونشكر كل الجماهير التي تؤازر المنتخب الوطني، منتخب مصر كأنه بيلعب في القاهرة، شوارع كندا كلها مصريين، كمان في أجانب بيشجعوا مصر، وبعد المباراة محمد صلاح واللاعيبة نزلوا رقصوا مع الجماهير في الشارع».

وتابع: «مصر كان ممكن تخلص الشوط التاني 5 أو 4 أهداف، زيزو كان هيدخل التاريخ، أنت رقصت الجون، والمرمى فاضى شوط على طول، إنت عاوز ترقص الشبكة، شوط يا زيزو في الجون، مش لازم ترجع تاني وتشوطها في الحارس، إنت كنت هتدخل التاريخ لو سجلت الهدف ده يا زيزو».