أكد الفنان محمد إبراهيم يسري، أن سيرة والده الطيبة وحب الناس له، يعد من أكبر نعم الله عليه، كما تطرق لأبرز الدروس التي تعلمها منه واستفاد من خبرته بها.
وجاءت تصريحات الفنان محمد إبراهيم يسري، لبرنامج" علمني أبي" مع هبة عبدالفتاح على إذاعات راديو النيل على النحو التالي:
_الحمد لله عشت طفولة سعيدة جدًا، مليانة حب، ومليانة مسرح وسينما، ومليانة حاجات حلوة.
_ البيت كان بيت فن، لكن قبل ما يكون فن كان بيت قيم.
_أكتر حاجة أثرت فيّ من شخصية والدي، الفنان الكبير الراحل إبراهيم يسري، مش بس كفنان لكن كأب… إن الواحد كل ما بيكبر وبيحتك بالحياة أكتر، بيبتدي يفهم هو كان قصده إيه.
_ وإنت صغير بتبقى شايف الدنيا من زاوية، وهو شايفها من زاوية تانية، وكل ما تكبر تلاقي نفسك فجأة بتتحول له في طباعك وطريقتك من غير ما تحس… وتقول لنفسك: آه، هو كان صح.
_ كان شايف أبي إن مهنة الفن رهان، يا إما ربنا يكرمك وتنجح، يا إما تعدي بأيام صعبة.
فكان شايف إن لازم يبقى معايا شهادة تانية أستند عليها.
_ مرة مثلت وأنا صغير في مسلسل شمس" يوم جديد"، ولما شاف قد إيه الموضوع جوايا وقد إيه أنا حابب ده، أدرك إني هفضل متمسك بيه.
_حب الناس لوالدي من أكبر النعم اللي ربنا أعطاه لي.
_ الناس كانت بتحب ابراهيم يسري فحبوني.
الإرث الحقيقي مش الاسم بل المحبة والسيرة الطيبة، مفيش حد يقدر يورّث غير ده.
_أهم درس اتعلمته من والدي ابراهيم يسري رحمه الله احترام اللي بتعمله، وحب شغلك.
_لو عايزين تعرفوا قيمة الفن، جربوا تعيشوا أسبوع من غير موسيقى، من غير أفلام، من غير مسرح.
_اختياراتي لأدواري مش نسخة من مدرسة والدي، لأن الصناعة اتغيرت جدًا.
لكن اللي بحاول أعمله إني دايمًا أختار حاجة أقدر أضيف لها وتضيف لي، دور له معنى وقيمة.
_نفسي أعمل أدوار تفضل في ذاكرة الناس، أدوار صادقة، إنسانية، تلمس حد وتحسسه إنه مش لوحده.
التعليقات (0)
لا توجد تعليقات حتى الآن. كن أول من يعلق!
أضف تعليقك