كشف إبراهيم عادل لاعب المنتخب الوطني ونورشيلاند الدنماركي عن تفاصيل رفض عرض النادي الأهلي في يناير الماضي.
وقال إبراهيم عادل خلال ظهوره بقناة أون سبورت: النني تواصل معي في الفترة الأخيرة من مرحلة تعاقدي مع نورشيلاند، وقولت له سلملي على الكابتن سيد وكان عايز يعمل معايا مكالمة فقولت له مش عايز أتكلم في حاجة ممكن متحصلش دلوقتي، وقولت له أشكره وشرف كبير اللعب للأهلي بس أنا عايز أخد خطوة الاحتراف.
وتابع: أنا باخد فلوس في نورشيلاند أقل بكتير جدا من اللي باخدها في بيراميدز والجزيرة، أقل بكتير جدا، ولم أتحدث مع الأهلي في أي شئ أو أي أمور مادية.
وأكمل: أنا مكنتش عايز أروح أصلا الإمارات في الأول، واتقالي في بيراميدز هتقعد باقيلك 3 سنين، لا هتكمل في النادي لا هتروح الجزيرة، كنت باخد عقد قليل جدًا جدًا في بيراميدز، فيه لاعيبه مكنتش بتلعب بتاخد أرقام أكتر مني، بس أنا كنت راضي وكانوا بيكفوني والكل كان مرضي الحمد لله، وكنت مبسوط جدا جدا.
وتطرق للحديث عن عرض لوجانو لبيراميدز: عرض لوجانو كان برقم كبير جدًا بـ 3 مليون دولار، والعرض اتبعتلي وأنا بعته لبيراميدز، ومعرفش الرقم اللي اتباعت بيه للجزيرة، ومعرفش تمت ازاي، وانضممت للجزيرة رغبة في الانتقال لـ أوروبا من هناك، واتفقت معاهم قبل التوقيع إن في حال وجود أي عرض أوروبي همشي لأني جاي هنا مرحلة تخليني أحترف في أوروبا.
التعليقات (0)
لا توجد تعليقات حتى الآن. كن أول من يعلق!
أضف تعليقك