خرج الشاعر والملحن عزيز الشافعي، عن صمته للمرة الأولى، للرد على الهجوم الكبير الذي طال أغنية «بحرية»، التي جمعت بين شيرين عبد الوهاب ومحمد حماقي، مؤكدًا أنه يتعرض لحملة هجوم ممنهجة خلال الأسابيع الأخيرة.
عزيز الشافعي يرد على هجوم أغنية بحريةونشر عزيز الشافعي فيديو مطولا قال فيه: «بسم الله الرحمن الرحيم، كل سنة وأنتم طيبين، عيد أضحى مبارك، طبعًا أنتم متعودين إني أطلع أمسك العود وأغني، مرات قليلة اللي بطلع أتكلم، لكن أغلب الناس خدوا بالهم من الحملة الهجومية الشديدة خلال التلت أسابيع اللي فاتت، وحبيت أطلع بس أتكلم».
وأضاف: «بدأت الحملة دي مع بداية عودة شيرين للغناء بأغنية (الحضن شوك)، والناس في البداية هاجمت الأغنية وقالوا ليه شيرين بتغني دراما كده، وبعد كده الأغنية نجحت جدا وحققت أرقام كبيرة، وبعد كده عملنا أغنية (تباعًا تباعًا)، وهي مش درامية، هي رومانسية وجميلة، وبرضه بدأت حملة هجومية شديدة أول تلت أيام وتريقة وسخرية من الأغنية ومن استخدام اللغة العربية، وحاجات كتير ضحكتني ومضايقتنيش قوي، لكن رغم الحملة دي، الأغنية نجحت نجاح كبير جدا وحققت أكتر من 20 مليون مشاهدة على يوتيوب، وأكتر من مليون فيديو على تيك توك».
وتابع «الشافعي»: «حسّيت إن الحملة دي ممكن تكون معمولة عليا أنا شخصيًا، أغنية (بحرية) اللي نزلت من يومين باين فيها أوي إن في قصد واضح للاغتيال المعنوي لعزيز الشافعي، والقضاء على النجاح المستمر من سنين طويلة، واللي توهج جدا في رمضان اللي فات بأغاني كتير زي (مش حبيبي وبس) و(نسيتي اللي كان) و(سوا سوا) و(خاينين) والإعلانات اللي عملتها».
تكرار الحملة مع أغنية (تباعًا تباعًا)وأشار إلى أنه «من بداية الأغنية، هي نزلت أول امبارح، وقبل ما تنزل بساعة الناس دخلت تشتم في الأغنية اللي لسه منزلتش، وحقيقي ده حصل في (تباعًا تباعًا)، لكن الأغنية نجحت جدًا جدًا ومتقلش نجاح عن أغنية مهمة جدًا عملتها لشيرين وهي (بتمنا أنساك)، أنا اتأذيت نفسيًا من اللي حصل، لأن في كلام اتقال عليا بالقسوة دي، وناس دخلت تهاجم الأغنية قبل ما تنزل أصلاً».
وأوضح عزيز الشافعي: «بقول لنفسي إيه اللي ورا الهجوم ده، وليه الناس ممكن تدخل تهاجم أغنية زي (بحرية) بالطريقة دي، بعض الناس كان في غِل، أنا آسف، أنا في الآخر عملت أغنية بطريقة جديدة للفلكلور، حكاية لطيفة لبنت عايزة حبيبها، زي أي ديو اتعمل زمان بين شادية وفريد الأطرش أو محمد فوزي، حاجات دمها خفيف، مفيهاش إسفاف ولا أي حاجة ضد الدين ولا حاجة سياسية، فمش فاهم طريقة الهجوم والحقد ده على شخص اسمه عزيز الشافعي مش حد تاني».
ولفت «الشافعي» إلى أنه «للأسف الهجوم الممنهج ده دفع ناس تانية تتأثر بالكلام ده، أنا بتكلم معاكم عشان أدافع عن نفسي، أنا معملتش حاجة، عملت أغنية بس، واحد بقاله 20 سنة بيحاول يخلق مشروع فني ونجح يوصل لمكانة كل الناس عارفاها، ويبدو إن في ناس مستكترة ده، لكن ده حصل بالاستحقاق وبعد تعب سنين طويلة».
وأكد: «أنا بدافع عن نفسي وعن المشروع بتاعي، وعن المكانة اللي وصلت لها، وده مش عزيز الشافعي اللي يعمل كده، كل الناس اللي حاولت تعمل تجديد وتخرج بره الإطار ده، لازم ندافع عن الإبداع والنجاح والتجديد».
وتابع عزيز الشافعي: «في بعض الزملاء القليلين جدا للأسف شاركوا في تلميح أو تصريح، وأنا مش زعلان، يمكن ده رد فعل مش مقصود، أنا واثق إن أغلب الناس اللي اشتغلت معاهم بينا عِيش وملح ومفيش مشاكل، الفيديو ده للناس اللي بتحبني وتأثرت بالكلام، ولأسرتي وكل اللي زعلوا، يمكن المحامي بتاعي ياخد بعض الإجراءات القانونية ضد بعض الإساءات، أنا مش حابب ده، لكن للأسف لازم يحصل، وفي الآخر أنا سعيد بنجاح (بحرية) و(تباعًا تباعًا)، ومسامح الناس اللي هاجمت وبعد كده حبت الأغنية، لكن مش مسامح اللي عملوا حملة ممنهجة عشان يضروني، وفي النهاية بشكر شيرين عبد الوهاب، وبقولها متزعليش، وإنتِ الأيام اللي فاتت كنتِ بتقوليلي متزعلش، وأنا اللي بقولك متزعليش.
مبروك عليكي النجاح».
التعليقات (0)
لا توجد تعليقات حتى الآن. كن أول من يعلق!
أضف تعليقك