علق الإعلامي عمرو أديب، على فوز النادي الأهلي بثلاثية نظيفة على الزمالك في قمة مباريات بطولة الدوري الممتاز، وقال خلال برنامجه «الحكاية» عبر شاشة «mbc مصر»، مساء الجمعة: «مفيش جديد.
نفس الغلاسة ونفس الرزالة.
مفيش حاجة بتتغير.
الأهلي قرر فجأة يبقى النهاردة فريق بطولات وتبقى عنده روح الفانلة الحمراء».
وأضاف: «الأهلي قرر يعمل كمل الأشياء الرخمة والرزلة.
والزمالك هو اللي إدى الكرة للأهلي للتسجيل.
وحسام عبدالمجيد سبب أهداف الأهلي.
الأهلي خد اللي هو متعود عليه والزمالك خد اللي هو متعود عليه وهو الزعل والنكد».
وتابع: «الزمالك كان بيلعب قدام فرقة فيها نجوم سوبر زي تريزيجيه وإمام عاشور وبن شرقي.
فرقة منزلة زيزو اللي بـ80 مليون جنيه بلعب آخر 5 دقائق.
لكن إحنا بنكمل مرتباتنا لآخر الشهر».
واستكمل: «الأهلي معندوش مانع يخسر الدوري والكأس لكن أهم حاجة يكسب مباراة القمة وينكّد على عمرو أديب.
الأمر تحول إلى مسألة شخصية جدًا أمام الزمالك».
غياب العدل في مسار المنافسةوأشار إلى غياب العدل في مسار المنافسة، وقال: «فين العدل.
هو الأهلي لعب بنكلة السنة دي ولا عمل أي حاجة طول الموسم.
ولا له أي لازمة.
كل اللي عمله إنه لعب ماتش النهاردة».
ولفت إلى أنه من غير المستبعد أن تخدم نتائج المباريات المقبلة الأهلي ويحقق لقب الدوري، وقال: " هو ده يبقى عدل.
مش المفروض من جد وجد».
وقال أديب: «أي ماتش أهلي وزمالك لازم يحصل السيناريو ده.
فين المنافسة.
هو فيه فرقة تجيب هدفين من كرتين راجعين من الدفاع.
ليه الأهلي لما بيهاجم بيبقى الزمالك مفتوح ولما الزمالك يهاجم يبقى الأهلي مقفول.
الأهلي كان بيهاجم كأنه مطلع طائرات إف 16».
التعليقات (0)
لا توجد تعليقات حتى الآن. كن أول من يعلق!
أضف تعليقك