مزعج والله …عبد الكريم قطاطة

7 جوان 2026، 20:45 التعاليق الواردة في الفيسبوك حول خسارتنا اليوم امام بلجيكا تؤكّد حقيقة واحدة.

ايّ منتخب كروي يمثّل جمهوره.

اقول هذا لسببين.

السبب الاوّل انّ المنتخب يمثل قبل كل شيء العلم.

من حقّ ايّ واحد ان يغضب.

ان يعلو صوته.

ان ينقد اختيارات المدرّب او اسلوب لعبه.

لكن دون شماتة.

تشمت في من ايها العزيز ؟ في منتخب بلدك ؟ هذا مرفوض مرفوض مرفوض يا ولدي.

وانا حزين جدا غيرة على علمي وعلى بلدي السبب الثاني جلّ المعلقين ينطلقون من الوان نواديهم … علاش هذا وموش هذا وعلاش لوخر وموش لوخر … في حين انّ واقع كرتنا واضح.

انه واقع مريض فكيف نطمع من الفرفزو العسل.

في تقديري الشخصي اؤكّد انّ الاسباب متعدّدة.

اوّلها مراكز التكوين في انديتنا … يخلف على الحومة سابقا التي اخرجت درر وجواهر في كرة القدم … كريستيك الله يرحمو عندما شاهد حمادي العقربي يداعب الكرة قالها دون لفّ ودوران _ ما عندي ما نعلّموا هذا الوليّد.

في الحومة كنّا نلعبوا صباحا على الحصحاص وسقينا نكملو بيهم مدموغين.

مدمدمين …هذا صباحا وفي المساء نعود للمقابلة الثانية بجرد سبادري وكانّ شيئا لم يحدث في مقابلة الصباح.

واللعبة في الصيف وفي الشيلي واحنا كيف الجنون.

الان مراكز تكوين الشبان اصبحت مراكز لولد سيدي فلان وسيدي فلتان والفقير يموت بغصتو.

وزيد عاد شكون يدرّب فيهم …لاعب قديم.

علاش يخخي النادي تكيّة للمتقاعدين من اللاعبين القدامى ؟؟ السبب الثاني موضة جلب اللاعبين مزدوجي الجنسية.

يكفي انو يلعب في فريق اوروبي وشعرو اصفر حتى نلجأ لوالديهم ونلحلحو بيهم باش الشنتي متاعهم يرضى علينا …هاكة الشنتي عمرو لا نهار فطر محمص او كسرا قدمة على قدمة.

وعمرو لا مشى للبحر مع عايلتو على كريطة وعمرو لا ساعد امّو على غسلان الجلود في البحر.

الشنتي متاع بونجوغ وشاي با موا je ne sais pas moi وزوت الورغ zut alors هذا بالحق تونسي ؟ هذا يقتل روحو في الترّاّن وتطلعلو شعرة سيدنا علي غيرة على بلادو ؟ يا ذنوبي.

صدقوني معظمهم حسبوها وعرفوا حقيقة امكانياتهم مع الفرق الاوروبية.

بمعنى لو كان البومة فيها خير ما تخلفها الصيادة … سبب اخر وهو كارثي.

الاعلام الرياضي.

هو فعلا كارثي.

اعلام لا علاقة له بالانتماء للمنتخب.

اعلام نوادي.

اعلام اعتبره معادي لتونس.

مع احترامي لاقلية من مقدمين او كرونيكورات _ معزّ بن غربية حيدر الشارني مهدي عبيد ياسين بوشعالة ومهدي قاسم.

هذه بعض الاسماء التي اتابعها وبكل شغف الاغلبية الباقية انحدار مهول في ميولاتهم الضيقة وفي تصفية حساباتهم والحقد والجهوية بادية في كل مواقفهم.

واترفّع عن ذكر اسمائهم لانّ تونس بكلّها تعرف.

انا لحدّ الان لم افهم كيف وقع ابعاد سامي الطرابلسي عن المنتخب في كاس العالم بعدان رشحنا برقم قياسي لم يحققه ايّ ناخب وطني قبله صفر هزيمة وصفر هدف مقبول … جزاء سنمّار ؟؟….

هذه الوضعية امتدت لعشرات السنين لكن تفاقمت بعد جانفي 2011 بدعوى حريّة الصحافة المحنونة وحريّة التعبير التي تتحول الى تبعير.

هذه الوضعية خلقت ايضا جماهير متعصبة نتنة اللسان.

والمليح فيهم لو تسالوا عن الكرة مستديرة او مستطيلة صدقوني يخمم سويعات وبعد يجاوبك حلزونية.

ويحلف والله اورجور يقصد تسلل.

ويحلف ثلاث مرات والله الشامبيونال عندنا _ يقصد البطولة.

للاسف وفي تقديري الشخصي المتواضع اصبحت لنا جماهير لا تختلف كثيرا عن مستوى كرتنا وممرنيها ولاعبيها واعلامييها.

نحاسة تغلي بماء يتحوّل سريعا الى بخار.

وهزّ ايدك من المرق لا يتحرق.

يطوّل عمرك يا شتالي.

وشكرا على ما قدمته لنا ذات 78 من كرة الامتاع والاقناع.

انا ومن عاصرني محظوظون لاننا عشنا زمنا كرويا جميلا واستمتعنا حقا.

مساكين ابناؤنا واحفادنا الذين ودائما بفعل كل الاسباب التي ذكرتها كرتهم اصبحت كورة مفشوشة مغشوشة مريوشة.

لمّوشة … اشتقاقا من اللموشي اوكة ما جبدتش الغنوشي اخيرا ارجو ان يكذبني اللموشي بداية من مقابلة السويد وكون صيد وكولني وصحة فرحة ليك و لتونس.

الان وبعد ما حدث في مقابلة بلجيكا اختم بتعليق فينو لسيدة على الفيسبوك وهو من نوع كان بودّي ان ابكي ولكنّي ضحكت حيث كتبت _ في اليوم السادس من الشهر السادس للعام السادس بعد 2020 قهرنا البلجيكيين ومنعناهم من تسجيل الهدف السادس.

اي نعم التونسي قادر على الطريزة حتى في احلك الاوقات.

اقسم بالله فخور بتونسي وبالتونسيين.

اما التونسيين الصادقين حتى وهوما مقهورين ….

6جوان 2026 Voir moins.